21 حاجة لازم تعرفهم وانت بتتم ال 21 .

1.. متحبش كتير و متحبش قليل و متتعشمش خالص .

الاعتدال ف الحب مش سهل خصوصا ان ف الموضوع داه بالذات عقلنا مبيعملش كنترول . بس و انت بتحب خلى ف دماغك ان الحد داه ف ايد ربنا هو اللى خلقه و هو اللى حطه ف طريقك ف وقت معين عشان لما ياخده من حياتك او ياخده من الدنيا تبقى عارف انه شاف انه ادى رسالته اللى كان جاى بيها فا ميبقاش قدامك غير انك تستعين بربنا ف كل اوقاتك .

و بالنسبة للعشم متتعشمش لانك هتلاقيك غصب عنك ابتديت تتضايق من اللى حواليك مش لانهم عملوا فعل 

يضايقك لا . عشان معملوش فعل انت كنت عايزهم او متوقع انهم يعملوه .

2.. ربنا كاتبلك رزقك 24 قيراط و ابتلاْئاتك 24 قيراط .

فا احمد ربنا على الاتنين و متحاولش تقارن اللى عندك ب حد لان التوزيعة ف الرزق متوزعة بطريقة تخليك كل ما تتمعن فيها تحمد ربنا , و كمان لو ركزت ف ابتلائاتك هتلاقيها متوازية مع قدرة احتمالك , و لو ف مرة حسيت انك مش قادر و الدنيا جاية عليك افتكر اننا بنتولد عبارة عن شوية سفنج و الدنيا بير مليان وساخة كلنا بننزله بس يا بخت اللى يطلع منه معصور لانه لو متعصرش ف نفس البير هيتعصر ف الاخرة . فا الحمد لله على كل ابتلاء بيخلص حسابنا و يكفر ذنوبنا .

3.. الناس بتأثر فيك مدة معينة بس بعدها بتدرك التأثير داه و بتبقى مخير انك تكمل او تسيبه .

متفضلش طول فترة طفولتك و مراهقتك تقنع نفسك انك ضحية ناس تانيين لمجرد انك معندكش الوعى الكافى انك تفكر . طبيعى انك تحس انك مضغوط حتى لو كنت انسان مرفه دى فطرة فينا .. لكن مع الوقت و الايام و لما بتكبر بتعرف ان الناس مجرد حكاوى صغيرة عشان تكمل حكايتك الكبيرة . فا ساعتها بتفلتر و تحارب عشان الناس اللى تفضل ف حياتك يكونوا بيضيفوا عليها مش بيستنزفوك و يخلوك بس مجرد برواز ف حكايتهم . الاختيار على اد مكان صعب على اد ما كان صح .

4.. اسمع كتير و اتكلم قليل .

اهم حاجة انك تدرك ان الكلام اللى بتقوله هو كلام انت بالفعل عندك علم بيه مجرد انك تطلعه للعلن هيكون افادة ليهم بس مش هيعود عليك ب اكتر من كدا , لكن انت كل مرة بتسمع فيها بيدخل دماغك حاجة جديدة حتى او الكلام اللى هتسمعه متكرر , تكراره علامة على شئ معين هتفهمه مع الوقت . اسمع كتير عشان تتعلم ب اكبر قدر تقدر عليه .

5.. اخواتك سندك .

مهما مر عليك علاقات و اصحاب مش هتلاقى حد ثابت و ف مكانه زى اخواتك و مهما غلطت هيفضلوا يعلموك . و مكانتهم ف القلب ثابتة . بصرف النظر عن الاستثناءات الخارجة عن الارادة ف بعض العائلات .

6.. اقرأ .

قرأت قبل كدا ان الانسان محب القراءة بيعيش حياوات كتييير جدا و حكاوى ناس و قصص بلاد و بيتنقل من مكان لمكان و هو ف نفس المكان . يعنى لو الفسح و الخروجات يعتبروا خروج للجسد فا القراءة خروجة العقل و القلب و الروح .

7.. خليك نفسك .

طول مانت راضى ربنا و بتحاول متأذيش حد حواليك ولا تأذى نفسك . ايه اللى يخليك تتغير ؟ ولا اى حاجة . متخليش حد يحاول يغير طريقتك و اسلوبك و كلامك و اهتماماتك . مترضيش ذوق حد لان ربنا لما خلقك خلقلك اللى يحبك زى مانت و يشوفك صح .

8.. لازم تكشف عيوبك قدام نفسك .

انت لو بتكابر و بتفضل تقول انك معندكش عيوب داه اكبر غلط , و هيوصلك بالتدريج انك تمشى تنتقض اللى حواليك و تطلع عيوبهم عشان بس تدارى عيوبك قدام نفسك . حاول انك توصل لنقطة تصالح مع نفسك .

9.. اكتشف نفسك .

انت روح و عقل و قلب و جسد اكيد الاربعة دول فى حاجة منهم مميزة عندك . اعرف ازاى تكتشفها و تقويها . و اكيد هتتميز بيها .

10.. استمتع باللحظات الحلوة .

اللحظات الحلوة قصيرة ف حياتنا بس بتجيلنا دايما ف الوقت اللى احنا محتاجينه فا حاول قدر الامكان تحسها و تستمتع .

11.. الاهتمام بالصحة مهم .

و دى حاجة انا فشلت فيها جدا الحقيقة بس عرفت انها مهمة للسنين الجاية .

12.. إسأل كتير .

انك تكون جاهل لمدة ثانية احسن ما تفضل جاهل العمر كله , لازم تسأل ف اللى مش عارفه و تنقى اللى انت هتسأله عشان متتسوحش .

13.. مش دايما هتلاقى اللى يقف جنبك و يدعمك .

وانت لو محتاج حاجة بجد مش هتحتاجلها دعم عشان تعملها . لكن بيكون احسن لما تلاقى حد مأمن بيك , و عشان داه يحصل لازم تأمن بنفسك الاول .

14.. اغلط عشان تتعلم .

لو فضلت دايما ماشى ف الصح مش هتتعلم و مش هتحس ب قيمة الصح االلى انت فيه , الغلط هو اللى بيخليك تتعلم سواء غلط ف اختيارات ناس او اختيارات طرق . المهم انها متتكررش و لو اتكررت يبقى عشان تضيفلك حاجة جديدة . احنا بننضج كدا .

15.. اعمل اللى عليك و متدورش عالنتيجة .

اعمل اللى عليك ف صلاة و صدقات و شغل و مذاكرة , و اتعب كتير . لان مش دايما العائد لعملك بيبقى ظاهر مش شرط عشان تعامل حد بما يرضى الله او تشتغل كتير يبقى ربنا يديلك فلوس كتير و ناس تحبك و تحب رضاك . اوقات ربنا بيبعد عنك اشخاص بتئذيك و اوقات بيبعد عنك المرض و اوقات بيحفظ حد غالى عليك , يعنى  لو انت فاحت نفسك شغل و مذاكرة و صلاة و دعا و يا دوب يومك بيخلص و انت و اهلك بخير و لقيت لقمة تشبعك و نمت فا تحمد ربنا الف مرة لان دى اكبر نعمة .

16.. خليك خفيف مؤثر افضل من تقيل زايل .

انك تبقى خفيف ف حضورك و كلامك و وجودك ف حياة الناس اللى حواليك داه هيساعدك ان مشاكل حياتك تقل و تكون بالتالى خفيفة . و هتكون قريب لقلب الناس و داه هيساعدك انك تأثر فيهم , لكن كونك شخص تقيل مش هيساعدك خصوصا لو انت نفسك مش عارف .

17.. اتعلم تسمع من ودن و تخرج من ودن .

طول مانت بتكبر و تتطور و تتقدم هتسمع اصواات كتير بتحاول تخرجك عن مسارك و تنشغل بيهم . داه فخ صدقنى , خلى حلمك سماعات ف ودنك و اخلع . الا لو لفت نظرك نقد بناء .

18.. متخليش حد يضحك عليك و يحجم حريتك .

متبقاش زى السمكة اللى اتاخدت من البحر و اتحطت ف برطمان و اتعودت عليه , و اول ما اتحطت ف حوض سمك حست ان الدنيا مش سايعاها , و انها كدا خدت حريتها . انت انسان متخليش حد يرسملك حدودك .

19.. انت مميز .

مساوئك و محاسنك بتخليك فريد . افعالك و ردود افعالك بتميزك . حبك لحاجات غريبة بيميزك .

20.. حافظ عالطفل اللى جواك .

مهما كبرت و العمر عدى حافظ عالروح البريئة الغبية التافهة . عشان حياة الجد مملة .

21.. هتموت .

الدنيا نقطة ف كتاب الابدية , مش مستاهلة ربع اللى بنعمله . عشان كدا لو ف ايدك تبنى ابنى . لو مش ب ايدك تبنى متهدش .