لأنه ‏أنتَ

أكتُب لك الأن لأنك أمانى و سكونى .. أنت كل الأشياء الخاصة بى التى لم تستثنى لى الفرصة ب مقابلتها فى اول سنين عمرى.  أعلم أن الله يخبئك لى .. كما يخبئنى لك طيلة هذه الأعوام .. و لكن ينتابنى الفضول من حين لأخر .. هل أعرِفُكَ ؟ أم لا ؟ هل ستأتى إلى قريبا ام انا التى ستفعل.  هل يوجد بيننا اشياء مشتركة ام سيتولد هذا بعد أول لقاء.  أُريد أن أراك الأن فأنا فى أمس الحاجة إليك. لا أعلم لما دائما ينتهى بى المطاف وحيدة بدونك كلما مررت بهذه الحالة . و هل ستتركنى بمفردى بمثل هذه الحالة مستقبلا ؟ اطمئنك إنه لا بأس بهذا فقط اعتدت جيدا على أن أمر بكل شئ وحدى و أن يمر كل ألم عبرى بسلام . الشئ الوحيد الذى لم اعتد عليه رغم غيابك هو التفكير بك .. فأنا اصرف ساعاتا طويلة و احيانا ليالى فى التفكير ، اين أنت الأن . مع من . هل مرت حياتك قبلى بسلام . ام تركت بك بعض الندوب و الاثار التى تنتظرني لأمحوها لك و اضع مكانها بعض ذكراياتنا معا . هل تعبت مثلى ؟ ام ما زلت تحارب . لا يمكننى التنبؤ بأى شئ سوى قرب مجيئك ، و عندما تأتى سنتحدث بكل موضوع على حدى ، لكن اريد منك إشارة أنه أنت . فالعالم ملئ بالزائفين وانا لا أُريد سِواك . لا أضمن لك إننى اكثر النساء نجاحًا او ذكائًا او حتى جمالًا . ولست اكثر النساء قوة ولا حنانًا . لكنى اكثرهم دعائًا و إنتظارًا لك ، و إننى لم اتخلى عنك ليوم واحد و لا عن إيمانى بك . و أعدُك إنك حين تأتى ستجدنى هنا على أهبه الإستعداد لضمك إلى و سماع كل ما قد مررت به ، ستجدنى ثرثارة حين تمل ، و ستجدنى هادئة حين تُرهق ، ستجدنى ضهرك حين تميل ، ستجدنى فى كل الأوقات لك . هل نجحت فى طمئنتك إذا ؟ حسنا ، أدعو الله أن يستجيب دعائى لك و أن يطمئن قلبك  و ان ينير طريقك إلى ، و أن يبعدك عن كل من أراد بك سوءًا و أن يقرب لك أحبتك و أن يمد لك فى رزقك وسع السموات والأرض . و فى الختام .. لا ختام بيننا هذه البداية .

إدارة الوقت فى زمن الكورونا

ادارة الوقت و التسويف و التشتت و الكورونا  

مبدأيا انت لو شخص عارف كويس هو بيعمل ايه و حاطط لنفسه هدف و بيسعى ليه و عارف خطواته كويس فا الكلام ده مش ليك . لكن لو انت حد تايه و اغلب وقتك بيضيع من غير ما تعرف بيروح فين كمل .

احنا اغلبنا بيضيع وقته و هو عارف ده كويس و بعضنا مش مدرك ل ده . و كمان اللى زاد دلوقتى موضوع الكورونا ان بقا عندنا التزامات او احتياجات و الوقت مفتوح بس احنا مش عارفين ننسق اى حاجة او بنحاول و نجتهد بس مفيش نتيجة مرضية .

- بتسأل نفسك كتير هو مش انا عندى نفس ال 24 ساعة اللى عند باقى الناس ؟ 
طب ازاى فى ناس بتقدر توازن يومها و تنجز حاجات كتير جدا فى نفس الوقت اللى ببقى فيه لسة بفوق و بسأل ها بقا عاملين اكل ايه النهاردة !
و ازاى الوقت بيخلص بسرعة و بحس بزهق و تأنيب ضمير لو فى شغل مسلمتهوش او مذاكرة ملحقتش احصل منها حاجة و دايما عايش ف دايرة الضغط ! 

- إنت ف كمين . 
يعنى ايه فى كمين ؟ فى سنويا مليارات بتتصرف فى برامج و فاعليات و سبورنسر لانفلوانسرز سوشيال ميديا "زى ما بيسموا نفسهم" و على ابلكيشنز جيمز و سوشيال ميديا و مسلسلات و افلام .
ليه ؟ 
عشان تكون انسان سطحى جميل لا يسمع لا يرى لا يتكلم . فا بتتحول من انسان ليك اهمية و ليك دور لمجرد لايك او كومنت او متفرج . و اقرأ عن الموضوع ده بتمعن عشان هتلاقى الموضوع ده بيأثر فى تكوين شخصيتك بطريقة كبيرة جدا ..

- انا بقولك الكلام ده ليه عشان تفوق نسبيا من الطريق اللى انت وقفت عنده و مش عارف تطلع و فاكر ان ده اخر العالم 
و لو انت بتقرأ الكلام ده و الكلام ده وصلك يبقى انت بالفعل بدأت تاخد خطوة و محتاج حد يدلك تبدأ منين و كمان محتاج تنقل الكلام ده على الاقل ل اتنين كمان فى دايرتك عشان انا عارفة ان الكلام ده صعب يوصل للشريحة المستهدفة عشان اولا ده بلوج شخصى و قليل جدا الناس اللى ليها بال عالقراية . ثانيا عشان محركات البحث على النت بتحاول تخلى الاكثر مشاهدة او الرائج هو اللى واخد مساحة .

طيب . عرفنا المشكلة فين .. محتاجين نعرف الحل بقا او اول الخطوات اللى ممكن نعملها .. 

- اللى هقولهولك دلوقتى هو ملخص ل فيديو ل ابراهيم عادل منZ American  English  مموزج ب بعض من استنتاجاتى و اللى ميعرفوش فايته كتير . الاحسن انك تدخل على اليوتيوب وتكتب " ادارة الوقت  " و تشوف الفيديو بتاعه و باقى الفيديوهات .

هو عمل 10 خطوات رئيسية لادارة الوقت اتمنى تستفادوا منها .

1- إعرف وقتك بيضيع ف ايه !
و انت احسن واحد ممكن يعرف ده و يقدر يحدده بدقة و فى ابلكيشنز تقدر تساعدك فى الموضوع ده عن طريق انها تقولك انت مسكت موبايلك كام ساعة فى اليوم و ايه اكتر بلات فورم استخدمته . و من هنا و من اول ما تعرف وقتك بيضيع ف ايه لازم تقف و تاخد خطوة ب استبعاد الوقت الضايع فى يومك واستبداله بحاجات تدعم هدفك . و لو اصلا معندكش هدف فانت محتاج تعرف تحدده الاول ازاى .

2- حدد هدفك ب طريقة صحيحة .
و الهدف ليه 5 قواعد انه يكون محدد و يمكن قياسه و يمكن تحقيقه و واقعى و ليه وقت . و هتسمع ده بالتفصيل ل ابراهيم عادل بردو فى فيديو " تحفيز الذات للنجاح "

3- الليلة السابقة .
انت لو صاحى من النوم مش عارف انت هتعمل ايه النهاردة يبقى احسن حاجة ممكن تعملها انك تكمل نوم تانى .
لكن الصح انك قبل ما تنام تكون عارف او كاتب انت هتعمل ايه بكرة و تقدر تمشى اليوم مش هو اللى يمشيك .

4- عقلية التحدى .
مترميش باللوم على المجتمع او العيلة او البيئة اللى انت فيها او الحالة المادية . لانك لو بتقرأ الكلام ده دلوقتى يعنى عندك موبايل و عندك ايد و عين و نت و تقدر تنمى نفسك و تعرف الصح و الغلط و الطرق المتاحة اللى تبدأ فيها سواء تحسن دخلك , تنمى مهاراتك او ايا كان و تبقى انت و المهمة بتاعتك يا قاتل يا مقتول . و تأكد انك لو دلوقتى مبتسعاش لهدفك فانت 100% بتسعى لهدف شخص اخر , حتى لو هدف غيرك ده انك تتفرج على اعماله او تزودله المشاهدة او تستخدم تطبيق او لعبة هو مبرمجها .

5- ترتيب الاولويات .

Eat The Frog  المثل على اد ما ممكن يكون مقرف بعض الشئ الا انه واقعى جدا . 

ابدأ دايما بالحاجات التقيلة على قلبك اوالصعبة واللى لازم تخلص فى يومك متبدأش بالسهل و تفضل تأجل الصعب لحد ما يتراكم عليك و يبقى مصدر ضغط .

6- إعزل نفسك .

خلى لنفسك مساحة وانت بتشتغل او بتذاكر او حتى بتقرأ او بتتعلم حاجة معينة , و خلى المساحة دى بعيدة عن انك كل دقيقتين تشوف مين بعت رسالة و مين حط ستورى و مين شاف اخر ستورى ليك و حلقة المسلسل اراء الناس فيها ايه و الترند ايه الجديد فيه . اعزل نفسك و سيب اى حاجة لحد ما تخلص اللى بتعمله .

7- انت زى باقى الناس .

بمعنى ان مش منطقى انك تركز ف اكتر من حاجة او حاجتين ف وقت واحد . لان ف الغالب مش هتنجز حاجة من الاتنين على اكمل وجه و لو حصل فى هيبقى ف وقت كبير . خلص حاجة حاجة بتركيز كامل احسن ما توزع تركيزك على كذا حاجة . و ده هيخليك تتجنب التشتت .

8- إنت مش ألة .

الألة هى اللى بتشتغل 8 و 10 ساعات متواصلين . فا لما تيجى تحط لنفسك حاجة تنجزها بلاش المثال اللى جاى ده :

من 9 ل 12 هذاكر المادة أ

من 12 ل 3 هشتغل على المشروع ج 

من 3 ل 6 هقرا اخر 5 فصول ف الكتاب 

و هكذا .... 

انت مش الة . سيب فواصل طويلة بين كل مهمة و التانية مثلا ساعتين ميهمكش بس ده هيعلى ف ادائك و يحسسك ب انسانيتك .

9- خليك وقح !

مش وقح بمعنى وحش .  بس اتعود تقول لا من غير كسوف لو الطلب اللى مطلوب منك مش تخصصك او هيعطلك عن اولوية ليك . لان الناس بتطلب اوقات من غير ما تراعى و من غير ما تعرف انت منظم وقتك ازاى فا مش هيعرفوا غير لما تقولهم لا انا فى الوقت ده هكون بعمل كذا .

10- إقرأ .

خليها عادة يومية لانها بتزود المدارك جدا و كمان بتخلى عندك ملكة الاستنتاج . حتى لو هتبدأ القراية لمقتطفات و ميكى و بطوط واحدة واحدة عقلك هيكبر و تقرأ كتب تفيدك .

لو شايف انك استفدت بلغ غيرك . و خليك عارف ان الوقت بيعدى و اى حاجة مهما كانت حلوة وحشة صعبة بتعدى . المهم انت اتعلمت ايه ؟